Joriy yilning 9- iyun kuni “O‘zbekkosmos” agentligi Bosh direktori v.b. Shuhrat Kadirov Kosmos bo‘yicha davlatlararo kengashiga a’zo MDH davlatlarining 3-yig‘ilishida ishtirok etdi.

- Mamlakatlarimiz o‘rtasida turli sohalardagi iliq munosabatlar va qo‘llab-quvvatlanayotgan aloqalarni hisobga olgan holda, kosmik sohadagi davlatlararo hamkorlik ham yangi mazmun kasb etishiga, mushtarak niyatlar ko‘zlangan natijalarga olib kelishiga umid qilaman.Yana shuni ta’kidlamoqchimanki, yaqinda “O‘zbekkosmos” agentligi qoshida Yerni masofadan zondlash va geoaxborot tizimlarini rivojlantirish sohasida qator vazifalar yuklatilgan “Kosmik monitoring va geoaxborot texnologiyalari markazi” Davlat unitar korxonasi tashkil etildi. Shu munosabat bilan, biz ko‘p yillik tajribangizga va har bir mamlakatning kosmik faoliyatni rivojlantirishga qo‘shgan hissasini inobatga olgan holda, ochiq hamkorlikka, tashabbuslarni muhokama qilishga, tayyormiz, - deydi “O‘zbekkosmos” agentligi Bosh direktori v.b. Shuhrat Kadirov.

Yig‘ilishning raisi etib bir ovozdan Roskosmosning Bosh direktori Dmitriy Rogozin saylandi, u to‘rtinchi majlisgacha Kengashni boshqaradi.

Yig‘ilish davomida ishtirokchilar tomonidan quyidagi masalalar muhokama qilindi:

• Kosmos bo‘yicha davlatlararo kengashning 2021-yil 27-yanvardagi ikkinchi majlisi qarorlarini ijro etish;
•  Kosmik sohada xizmatlar ko‘rsatish va ulardan foydalanish bo‘yicha MDH a’zo davlatlarining Davlatlararo dasturi konsepsiyasi loyihasi;
• MDH a’zo davlatlarning tabiiy va texnogen favqulodda vaziyatlarni prognozli monitoring qilishning ko‘p maqsadli aerokosmik tizimini yaratish bo‘yicha hamkorligi;
• MDH a’zo davlatlarning Yer atrofidagi kosmik makonining texnogen ifloslanishini monitoring qilish tizimini ishlab chiqish bo‘yicha hamkorligi;
• MDH a’zo davlatlarning hamroklikda amalga oshirilayotgan loyihalarni normativ-texnik ta’minlash bo‘yicha hamkorligi;
• Yerni masofadan zondlash bo‘yicha kosmik tizimi yaratish;
• Kosmik sohada kadrlarni tayyorlash va qayta tayyorlash;
• Kosmos bo‘yicha davlatlararo kengashning 2022-2023 yillardagi ish rejasini tasdiqlash.

Navbatdagi yig’ilish 2023-yilning birinchi yarmida Tojikiston Respublikasida o‘tkazilishi rejalashtirilgan.

Axborot xizmati