“Oʼzbekkosmos” agentligi 10 nafar oʼquvchilarni Turkiyadagi kosmik oromgohga yubordi!

“Space Camp Turkiye 2024” loyixasi doirasida bu yil ham astronavtika va fazo texnologiyalariga qiziqqan, 9 yoshdan 15 yoshgacha boʼlgan iqtidorli maktab oʼquvchilari saralanib “Oʼzbekkosmos” agentligi koʼmagida Turkiyaning Bursa shahridagi “GUHEM” kosmik aviatsiya oʼquv markaziga yuborildi.

Yevropadagi eng yirik va dunyoda kuchli beshlikka kiruvchi mazkur markazda oʼzbekistonlik yoshlar astronomiya, fizika, biologiya, kimyo va boshqa fanlar boʼyicha bilimlarini yanada oshirib, 150 dan ziyod interfaol mashgʼulotlarda ishtirok etishmoqda. Shuningdek, simulyatsion kosmik sunʼiy yoʼldoshlar, aviatsiya tizimlari bilan yaqindan tanishib, kosmik modellashtirish yoʼnalishida faol qatnashishyapdi.

Qayd etish lozim, Turkiy davlatlar tashkilotiga aʼzo davlatlarning kosmik agentliklari bilan hamkorlikda tashkil etilayotgan ushbu xalqaro loyihada “Oʼzbekkosmos” agentligi 2023 yildan buyond ishtirok etib kelmoqda. Hozirga qadar 20 nafar maktab oʼquvchilari “Space Camp Turkiye”ning faxriy aʼzolari sifatida maxsus sertifikatlarga ega boʼlishgan.

Аlbatta, bu kabi tashabbuslar kosmik yoʼnalishda iqtidorlik kadrlar bazasini yaratish, ularning tajribasini oshirish va sohaning eng soʼnggi yechimlari bilan yoshlarni doimiy tanishtirib borishga katta hissa qoʼshadi. “Oʼzbekkosmos” agentligi esa bu borda faol oʼgʼil – qizlarni qoʼllab -quvvatlashga doim tayyor.

"O'zbekkosmos" agentligi Axborot xizmati!